មហាសេដ្ឋីលំដាប់កំពូលរបស់ពិភពលោក Mark Zuckerberg បាននិយាយកាលចុងសប្តាហ៍មុនថា ក្រុមហ៊ុន Meta Platforms របស់ខ្លួន គ្រោងនឹងចំណាយទឹកប្រាក់ច្រើនមហាសាលរហូតដល់ទៅ ៦៥ពាន់លានដុល្លារ ដើម្បីពង្រីក និងអភិវឌ្ឍហេដ្ឋារចនាសម្ព័ន្ធ AI របស់ខ្លួននៅឆ្នាំនេះ ក្នុងគោលបំណងពង្រឹងជំហរដើម្បីប្រឆាំទៅនឹងគូប្រជែងធំៗ ដូចជា OpenAI និង Google ជាដើម។ នេះបើតាមការចុះផ្សាយពីសារព័ត៌មាន CNA។
ជាមួយផ្នែកមួយនៃការវិនិយោគសរុប ក្រុមហ៊ុន Meta នឹងបែកចែកមួយចំនួន ទៅលើការបង្កើនតួនាទីសម្រាប់បញ្ញាសិប្បនិមិត្ត និងការសាងសង់មជ្ឈមណ្ឌលទិន្នន័យមានកម្លាំងលើសពី ២ ជីហ្គាវ៉ាត់ ដែលមានទំហំធំល្មមសម្រាប់គ្របដណ្តប់ផ្នែកសំខាន់ៗនៃសង្កាត់ Manhattan ទាំងមូល។
ទន្ទឹមនឹងនេះ លោក Mark បាននិយាយនៅក្នុងសារមួយបង្ហោះលើបណ្តាញសង្គម Facebook ថា៖”នេះនឹងជាឆ្នាំកំណត់ត្រាសម្រាប់បច្ចេវិទ្យា AI។ ហើយវាគឺជាការខិតខំប្រឹងប្រែងដ៏ធំមួយ នៅក្នុងរយៈពេលប៉ុន្មានឆ្នាំខាងមុខនេះ AI នឹងដើរតួនាទីយ៉ាងសំខាន់ ក្នុងការជំរុញផលិតផល និងអាជីវកម្មស្នូលរបស់យើង”។
គួរឲ្យដឹងផងដែរថា ក្នុងរយ:ពេលចុងក្រោយនេះ ក្រុមហ៊ុនបច្ចេកវិទ្យាធំៗបាននឹងកំពុងវិនិយោគទឹកប្រាក់រាប់សិបពាន់លានដុល្លារ ដើម្បីអភិវឌ្ឍហេដ្ឋារចនាសម្ព័ន្ធ AI បន្ទាប់ពីបានមើលឃើញពីភាគជោគជ័យរបស់ក្រុមហ៊ុន OpenAI ទៅលើការបង្កើតកម្មវិធី AI ChatGPT ។
ជម្រាបជូនថា ជុំវិញការប្រកាសរបស់ Meta នេះ ត្រូវបានធ្វើឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសថាក្រុមហ៊ុន OpenAI, SoftBank និង Oracle នឹងបង្កើតក្រុមហ៊ុនបណ្តាក់ទុនរួមគ្នាមួយដែលមានឈ្មោះថា Stargate ក៏ដូចជាបោះទុនវិនិយោគ ៥០០ពាន់លានដុល្លារ នៅក្នុងហេដ្ឋារចនាសម្ព័ន្ធ AI នៅទូទាំងសហរដ្ឋអាមេរិក នៅឆ្នាំនេះ៕
Leave a Reply