អាមេរិក៖ ប្រធានាធិបតីអាមេរិក លោក ដូណាល់ ត្រាំ បានឱ្យដឹងថា លោកប្រហែលជាជួបប្រធានាធិបតីលោក វ៉ូឡូឌីមៀ ហ្សេលេនស្គី នៅសប្តាហ៍ក្រោយ ដើម្បីពិភាក្សាអំពីសង្រ្គាមអ៊ុយក្រែន ដើម្បីឆ្លើយតបនឹងការឈ្លានពានរបស់រុស្ស៉ី។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៨ ខែកុម្ភៈ ឆ្នាំ ២០២៥។
លោក ត្រាំ មិនបានបញ្ជាក់ច្បាស់ថាជាជំនួបផ្ទាល់ ឬតាមប្រព័ន្ធវីដេអូទេ ដោយគ្រាន់តែនិយាយថា ប្រហែលជាជួបលោក ហ្សេលេនស្គី ក្នុងសប្តាហ៍ក្រោយ ជាមួយនិងការបង្ហាញចំណាប់អារម្មណ៍ម្តងទៀត ។
នៅពេលត្រូវបានសាកសួរអំពីទីតាំងនៃជំនួប លោក ត្រាំបានកត់សម្គាល់ថា« ខ្ញុំនៅទីនេះ នៅក្នុងទីក្រុងវ៉ាស៊ីនតោន ហើយថាលោកមិនទៅអ៊ុយក្រែនទេ»។ ទាក់ទងនឹងបញ្ហាសង្រ្គាម លោក ត្រាំ គូសបញ្ជាក់ថា ខ្ញុំចង់ឃើញវា«បញ្ចប់ដោយផ្អែកទៅលើមូលដ្ឋានអាយុជីវិតមនុស្ស»។
គួរបញ្ជាក់ថា អ៊ុយក្រែន ដែលចង់បានការបន្តគាំទ្ររបស់សហរដ្ឋអាមេរិកក្នុងសង្រ្គាមជាមួយរុស្ស៉ី ក៏កំពុងទន្ទឹងរង់ចាំដំណើរទស្សនកិច្ចខែនេះ ដោយបេសកជនពិសេសប្រចាំតំបន់របស់លោក ត្រាំ គឺលោក Keith Kellogg ផងដែរ៕
Leave a Reply